Image

Irizar e-mobilityren autobus elektrikoak Krakoviako kaleetan barrena ibiliko dira datorren urtean, Polonian

Aduna, 2022ko azaroaren 25a

Irizar e-mobilityk Europako iparraldean merkatu berriak lortzen jarraitzen du, eta kontratu bat sinatu du MPK Krakow poloniar operadorearekin (Miejskie Przedsiebiorstwo Komunikacyjne), zero emisioko lau autobus %100 elektriko hornitzeko. Kontratuak hiru autobus gehiago entregatzeko aukera aurreikusten du.

Horrenbestez, Krakovia Poloniako lehenengo hiria da bere flotan Irizar e-mobility autobus elektrikoak gehitzen.

Operadoreak aukeratu duen modeloa 12 metroko luzerako Irizar ie bus da. Autobus isil, seguru eta erosoa da, eta, zalantzarik gabe, lagundu egingo du hiri horren trantsizio energetikoan eta mugikortasun jasangarriaren arloan dituen helburu handiak betetzen.

Ibilgailuek Irizar teknologia propioko bateriak dituzte, eta 3 ate, gidariarentzako eserlekua, 26 eserleku eta 91 bidaiari eramateko lekua. Irtenbideak dituzte mugikortasun urriko pertsonentzat eta gurpil aulkietarako guneak, irisgarritasuna errazteko eta autobus barruko zirkulazioa arintzeko. Bottom-up pantografo baten bidez kargatu ahal izango dira, edo kotxetegietan, Combo 2 motako karga hartune baten bidez 1. ardatzean. Kargagailuen horniduraz Irizar Taldeko Jema Energy enpresa arduratuko da.

Segurtasun sistemei dagokienez, besteak beste, autobusek CCTV sistema osoak dituzte, pertsonak zenbatzeko sentsoreak eta angelu hiletarako kamerak.

“Oso pozik gaude Krakoviako bidaiariek urtebetean Irizar e-mobilityko autobus elektriko berrietan bidaiatuko dutelako. Hau izango da Poloniako lehen elektromugikortasun proiektua konpainia horrentzat. Etorkizunean lankidetza ona espero dugu Irizar e-mobility-rekin”, dio Marek Gancarczyk MPK Krakoviako bozeramaileak.

“Lehenengo aldia da gure mugikortasun jasangarriko soluzioak Poloniako hiri batean ezartzen ditugula, eta horrek harrotasunez eta pozez betetzen gaitu. Gure autobus elektrikoekin, espero dugu Krakoviako hiritarren bidaien esperientzia aberastea, eta haien bizi kalitatean eragin positiboa lortzea”, adierazi du Mikel Irizarrek, Irizar e-mobilityko Europa ekialdeko arduradun komertzialak.

Aurtengo urtarrilean, hiriko biztanleek Irizar e-mobilityren autobus elektriko batean bidaiatzeko aukera izan zuten, zehazki, ie tram batean, zeina probak egiten ibili zen Europako hainbat hiritan.

Zalantzarik gabe, kontratua beste urrats bat da Irizar Taldea Europako merkatuan mugikortasun jasangarrirako soluzioen inguruan posizionatzeko estrategiaren barruan.

Tuterak Irizar e-mobilityren autobus elektrikoen aldeko apustua egin du

Tuterak hiriko garraio zerbitzu berria aurkeztu du, datorren urtean zehar martxan jarriko dena. Bere flotan Irizar ie tram modeloko bi autobus jarriko ditu martxan, 12 metro luzerakoak eta % 100 elektrikoak

 Zerbitzuaren aurkezpenean, komunikabideek, hiriko hainbat taldetako kideek eta nahi izan duten herritarrek ibilgailu moderno hau probatu ahal izan dute, Tuterako hiri-garraioan zero igorpeneko erronka lortzeko.

Irizar e-mobilityk Irizar ie trama aurkeztu du Euro Bus Expo azokan, azaroaren 1etik 3ra

Birmingham, 2022ko azaroaren 2a

Euro Bus Expo 2022ra doazenek gidaria eskuinaldean daraman lehen ie tram autobusa ikusteko aukera izango dute. Ikusgai dagoen ie tram hau Londresko Go Ahead konpainiak egindako eskaeraren 20 autobusetako bat da, hain zuzen ere.

A10 standean, azken belaunaldiko lau ibilgailu jarri ditu erakusgai Irizarrek: Irizar i6S Efficient berria, Irizar i8 bat, Irizar i4 bat eta Irizar ie tram autobus elektrikoa. Irizarrek lehenengoz erakutsiko ditu eraginkortasunean oinarritutako ibilgailu horiek Erresuma Batuko merkatuan, eta horrek mugikortasun iraunkorraren sektorearen abangoardian kokatzen du marka.

Irizar i6S Efficientek duela gutxi jaso zuen 2023ko autobus iraunkorraren saria, autokarren kategorian. Gainera, Erresuma Batuko merkatuak ibilgailu berri hori ezagutzeko aukera izan du, uda osoan egindako ikuskizun ibiltari bati esker. Operadore guztiak pozik agertu dira produktuak dituen hobekuntzekin, batez ere erregaian lor daitekeen murrizketarekin. Azoka amaitzen denean, ikusgai dagoen i6S Efficient ibilgailua erakusketarako autokar gisa erregistratuko da, operadoreek probatu ahal izan dezaten.

Azokan ikusgai dagoen Irizar ie Tram autobusa Irizar e-mobilityk Londresko Go Ahead enpresari helaraziko dizkion 20 autobus eta dagozkien kargarako azpiegituretako bat da. Horren bidez, Londresko hegoaldeko 358. linea elektrifikatuko dute, Erresuma Batuko hiriburuan karga ultraazkarreko lehenengoa.

Era berean, Irizarrek, bere erakusmahaian, zerbitzu publikoko ibilgailuen irisgarritasunari buruzko araudia (PSVAR) betetzen duen 71 eserlekuko lehen Irizar i4 arina eta ispilurik gabeko lehen Irizar i8 modeloa erakutsiko ditu, 14 metroko luzera eta 50 eserlekuko edukiera dituena azken hori, St Helenseko Ellisons Travelekin lankidetzan Premier Leagueko kirol garraiorako ibilgailu egokia bihurtzeko prest. Irizar i8 autobusak diseinuaren, teknologiaren eta iraunkortasunaren konbinazioari eusten dio, gidariari, bide erakusleari eta bidaiariei aparteko erosotasuna eskaintzeaz gain. Merkatuko teknologiarik aurreratuena daukanez, Irizar i8 da kirolaren erraldoiek eta sektoreko izen handiek aukeratutako ibilgailua.

Bi pandemia urte zailen ondoren, Irizar Birminghamera iritsi da, mugikortasunaren etorkizunak dituen erronka berriei aurre egiteko helburu argiarekin eta egungo garaiek eskatzen dizkiguten eraginkortasun eta iraunkortasun erronkei erantzuteko helmuga aldagaitza lortzeko asmoz.

Irizar e-mobilityk Londresko karga ultra azkarreko lehen autobus linea elektrifikatuko du

Aduna, 2022ko urriaren 27a

Irizar e-mobilityk eta Londresko Go-Aheadek hogei autobus eta kargarako azpiegiturak hornitzeko kontratu bat sinatu dute, eta, horren bidez, Londresko hegoaldeko 358. linea elektrifikatuko dute, Erresuma Batuko hiriburuan karga ultra azkarreko lehenengoa.

Akordio horrekin, Go-Aheadek, Londresko autobus operadorerik handienak, Irizar e-mobilityrengan konfiantza izan du berriz ere, eta hogei autobus elektriko eta horiek kargatzeko azpiegitura erosteko kontratua sinatu du. Jema Energyk (Irizar Taldearen enpresa filiala) 450 kW-eko bi kargagailu ultra azkar emango ditu ibilbideko terminaletarako, eta 100 kW-eko kargagailuak kotxetegietarako, aldi berean bi autobus 50 kW-era kargatzeko gai direnak.

Diseinu zirraragarria eta modernoa duenez, aukeratu duten modeloa Irizar ie tram da, 12 metroko luzerakoa. Gidariaren tokia eskuineko aldean duela fabrikatzen den lehen autobusa izango da, baita Erresuma Batuan sartzen den lehena ere. Zero igorpenen, zarata eta bibrazio maila baxuaren eta segurtasun eta irisgarritasun ezaugarrien ondorioz, autobus bereziki egokia da Londres bezalako hiri batean erabiltzeko.

Autobusek Irizar Taldearen azken belaunaldiko bateriak izango dituzte, eta ibilbidean zehar instalatutako sistema alderantzikatuko karga azkarreko bi pantograforen bidez kargatuko dira (Crystal Palaceko eta Orpington Bus geltokietan). Pantografo horiei esker, autobusak 5 minutu baino gutxiagoan kargatuko dira. Ibilbidea amaitutakoan, autobusek birkarga labur bat jasoko dute, kotxetegietako kargagailuak erabiliz.

Irizar ie tram, tranbia baten antzeko diseinu dotorearekin, beste autobus batzuetatik bereizten da, edukiera handia, sarbide erraza eta barruan bidaiarientzako espazioa zabala eta hiri autobusen moldagarritasuna uztartzen dituelako. Autobuseko bidaiarien eremua argitsua, erosoa, zabala, atsegina eta segurua da.

Bere ekipamendu berritzailea eta bidaiarientzako eta oinezkoentzako segurtasun pasiboaren maila dira operadorea ibilgailu hori aukeratzera eraman duten alderdi bereizgarriak, izan ere, Irizar ie tramek, bere diseinu frontalagatik, oinezkoen babesari buruzko Transport for Londonen (TFL) 2024 segurtasun araudia betetzen du.

Irizar e-mobilityren zero igorpeneko autobusak Crystal Palace eta Orpingthon lotzen dituen 358. linean ibiliko dira, eta 2022aren amaieran entregatzea aurreikusita dago.

"Ilusio handiz gaude Go-Aheadek, Londresko autobus operadore handienak, gure teknologia aukeratu duelako. Gugan jarritako konfiantzaren eta produktu horien kalitatearen eta fidagarritasunaren erakusgarri argia da. Londres garraio publiko jasangarri baterako konponbideetan asko inbertitzen ari den hiri bat da, eta harro gaude helburu horren parte izateaz. Gure karrera teknologikoarekin jarraitzen dugu, eta eragiketa honekin karga ultra azkarreko Londresko lehen linea ezarriko dugu, Transport for Londonen (TFL) eskakizun zorrotzak betez”, adierazi du Iñigo Etxeberria Irizar e-mobilityko zuzendari nagusiak.

Birminghameko Euro Bus Expo azokara bertaratzen direnek lehen autobusa bisitatzeko aukera izango dute, A10 standean egongo baita ikusgai azaroaren 1ean, 2an eta 3an. Irizar gamako autokarrak eta Irizar Taldearen beste teknologia batzuk ere egongo dira erakusketan. 

Kontratu berri horrekin, Irizar taldeak erakutsi du teknologia eta berrikuntzarako izugarrizko gaitasuna daukala, eta hiri mugikortasunean lider gisa posizionatzeko asmoa berretsi du, hirietan ingurumen jasangarritasunaren eta hobekuntzaren alde egiteko konpromiso irmoarekin.

Irizar e-mobility, Milango Next Mobility Exhibition azokan

Milan, 2022ko urriaren 12a

Irizar e-mobilityk elektromugikortasunarekin lotutako bere azken aurrerapenak eta berrikuntzak aurkeztuko ditu Milanen (Italia), urriaren 12an, 13an eta 14an egingo den Next Mobility Exhibition azokan.

6.hallean Irizarrek izango duen D38E49 zenbakiko 330 m2-ko standean, Irizar Taldearen autobus jasangarrien gamako bi ibilgailu ikusi ahal izango dira. Irizar ie tram bat, 12,160 metroko luzerakoa, eta Irizar i3le hibrido bat, 12,750 metrokoa.

Irizar ie tram-en ezaugarriak dira ibilgailu abangoardista dela eta ingurumenarekiko errespetuz jokatzen duela. Azokan ikusgai egongo den ie tram-ak Irizarren azken belaunaldiko 430 kWh-ko bateriak ditu, eta 240 kW-ko trakzio motorrarekin hornituta dago. 3 ate ditu, 22 eserleku bidaiarientzat (horietatik 4 MUPentzat), 2 gune aulki gurpildunentzat eta orgatxoentzat, arrapala elbarrientzat eta 74 bidaiari har ditzake guztira. Unitate honetan karga motela egiten da combo 2 motako mahuka duten kotxetegietan, baina zero igorpeneko Irizar autobusek pantografo bidez kargatzeko aukera ere eskaintzen dute (pantografo alderantzikatua edo sabaian muntatua). Autobus honen bertute handienetako batzuk, hain zuzen, diseinu futurista, pertsonalizazio maila handia, edukiera handia, barrura sartzeko erraztasuna eta erosotasuna dira. Autobusa %100 elektrikoa da, zero igorpenekoa, eta bidaiarien esperientzia aberasteko helburua dauka. Autobus modelo hori 12 eta 18 metrotan dago eskuragarri, eta Irizar Taldearen teknologia du, energia kargatzeko, trakziorako eta biltegiratzeko sistemei dagokienez.

Irizar i3le modeloa, berriz, low entry ibilgailua da, eta funtzionaltasuna eta irisgarritasuna ditu ezaugarri nagusi. Erakusgai dagoen unitateak full-hybrid Scania txasisaren gainean dauka karrozeria, eta 9 litroko eta 320CV-ko diesel motorra, 12 martxako Scania Opticruise abiadura aldagailua eta 130kW-ko motor elektrikoa ditu, azken hori diesel motorraren eta abiadura aldagailuaren artean. Transmisioan txertatutako motor elektriko indartsu horrek 3 km-rainoko autonomia eskaintzen du modu elektrikoan, eta erregaia %30era arte aurrezteko aukera ematen du. Modelo hori 10,95 metrotik 15 metrora arteko luzeretan dago eskuragarri. Ateek hainbat konfigurazio eta kokapen dituzte (orri bikoitza, orri sinplea) eta MUPentzako arrapalak (eskuzkoa edo automatikoa) aurreko atean edo ate nagusian. Irizar i3le hainbat antolamendutara egokitzen da, eserita zein zutik dauden bidaiarien kopurua maximizatu eta zerbitzuaren eskakizuna betetzeko.

Bi autobus horiek isilak dira eta ingurumena errespetatzen dute. Itxura denez, mugikortasun kolektibo jasangarrirako funtsezko elementu bihurtuko dira, ingurumen inpaktua nabarmen murrizten eta herritarren bizi kalitatea hobetzen laguntzen baitute.

Gaur bere standean emandako prentsaurrekoan, Iñigo Etxeberria Irizar e-mobilityko zuzendari nagusiak esan du “elektromugikortasunaren merkatua aurrerapauso erraldoiak” ematen ari dela, eta “datozen hilabeteetarako hazkunde aurreikuspenak positiboak” direla.  “Gure zero igorpeneko autobusek oso harrera ona izaten jarraitzen dute Europako merkatuan”, esan du, eta konpainiak besteak beste Parisen, Madrilen, Londresen, Estrasburgon, Burgasen, Bernan edo Zaragozan izan dituen azken esleipen garrantzitsuenetako batzuk aipatu ditu. Italiako merkatuari dagokionez, Irizar e-mobilityko zuzendari nagusiak zera esan du: “Italia merkatu garrantzitsua eta estrategikoa da guretzat. Merkatu horretan elektromugikortasunak hazkunde handia izango du datozen urteetan.  Zero igorpeneko garraio sistemen horniduran dugun esperientziak ezin hobeto egiten du bat herrialde hau hartzen ari den norabidearekin”. Eta honela amaitu du Etxeberriak bere diskurtsoa: “Gure ibilgailuen eraginkortasuna eta automatizazioa handitzeko lanean jarraitzen dugu, baterien garapen berrietan lanean eta segurtasun estandar berriak inplementatzen”.

Irizar, Italian erreferente

Irizar Italiaren lehen urratsak 1993koak dira, urte hartan hasi baitzuen Irizarrek jarduna Mediterraneo iparraldeko herrialde horretan. Irizar Italiak eskaintzen duen produktu sorta zabala da, merkatuko osoenetako bat, eta teknologia handiko autobusak sortzen ditu Premium segmenturako, baita hiriarteko autobusak, teknologia hibridoa edo biodiesela duten II klaseko modeloak eta zero igorpeneko I klaseko hiriko autobus elektrikoak ere. Gainera, saldu osteko sare bat du, herrialde osoan zerbitzua ematen duena.

Irizar e-mobilityri buruz

Irizar e-mobility elektromugikortasunean aritzen den enpresa da, Irizar Taldekoa. Adunan dago, Donostiatik 20 kilometro eskasera. Han, Irizarrek hiri ibilgailuak egiten ditu, %100 elektrikoak eta zero igorpenekoak. Ibilgailu horiek bateria sistema propioak dituzte, baita karga azpiegiturak ere, eta floten kudeaketaren digitalizazioa dakarte. Hori guztia Irizar Taldearen teknologiarekin eta tokiko zentro teknologikoen sarearen laguntzarekin garatu da, eta horrek etorkizuneko enpleguan eta lurraldeko aberastasunean laguntzen du.

Irizar Taldeari buruz

Irizar nazioartean presentzia duen enpresa talde bat da, eta gaur egun jarduera dauka honako sektore hauetan: bidaiarien garraioa, elektromugikortasuna, elektronika, motor eta sorgailu elektrikoak, konektibitatea eta energia.

Taldea 7 enpresak osatzen dute (Irizar, Irizar e-mobility, Alconza, Datik, Hispacold, Masats eta Jema) eta haien jarduna 13 lantegitan egiten dute Espainian, Marokon, Brasilen, Mexikon eta Hegoafrikan. Gainera, I+G Zentro bat ere badu, zeinak Taldearen beraren produktu eta sistemen ikerketa aplikatua eta garapen teknologikoa dituen helburu.

Irizar S. Coop da Taldeko enpresa matrizea eta egoitza nagusia Ormaiztegin dago. Han dago Creatio ere, Irizar taldearen Ikerketa eta Garapenerako Zentroa.

1889an sortu zen Irizar Taldea, eta gaur egun dagoeneko talde sendoa da. 3.500etik gora pertsonak osatzen dute, geografikoki eta industrialki dibertsifikatuta dago, etengabe hazten ari da, eta apustu irmoa du egina markaren, teknologiaren eta iraunkortasunaren alde.

Iñigo Etxeberria Irizar e-mobilityko Zuzendari Nagusi berria

Aduna, 2022ko irailak 29

Iñigo Etxeberria, gaur egun Irizar e-mobilityko esportazioko zuzendari komertziala denak, urriaren 1ean hartuko du kargua.

Etxeberriak, besteak beste, trenbide sektorean eta siderurgia industrian bere ibilbide profesionalean erantzukizun handiko hainbat lanpostutan esperientzia handia izan ondoren hartuko du kargu hori, eta azken urte honetan Irizar e-mobility-ren proiektu europarrak zuzendu ondoren.

Gogo eta ilusio handiz helduko dio lan berriari eta elektromugikortasunaren etorkizuneko erronkei heltzeko helburu sendoa du.  Etxeberriaren hitzetan “bezeroaren hurbiltasun eta leialtasun estrategia finkatzea da lehentasuna, eta haiei elektromugikortasun soluzio integralak eskaintzea. Sortu zenetik, Irizar e-mobility aldaketaren trantsizioaren buru izan da  eta etengabeko hazkunde horren bidean jarraituko dugu”.  

 

Irizarrek arrakasta profesional handienak opa dizkio, eta ziur gaude Irizar e-mobilityren sendotasun eta hazkunde bidearekin jarraituko duela mundu hobe bat sortzeko bidean.    

Irizar e-mobilityren hamabi autobus elektriko Palmarako

Aduna, 2022ko irailaren 27a

Irizar e-mobilityk zero igorpeneko hamabi autobus %100 elektriko hornituko dizkio Palmako EMTri. Lehenengo unitateak 2023. urtearen hasieran entregatzea aurreikusten da, eta Mallorca uharteko hiriburua deskarbonizatzeko prozesua azkartzen eta trantsizio energetikoa egiten lagunduko dute.

Nobedade gisa, ibilgailu horiek eguzki plakak izango dituzte goiko aldean, autobusaren sistema osagarriak elikatzeko.

Astelehen honetan, Irizar e-mobilityk Jose Hila Palmako alkatea, Francesc Dalmau Mugikortasun Iraunkorreko zinegotzia eta Mateu Marcus Udal Garraio Enpresako (EMT Palma) gerentea hartu ditu Adunan (Gipuzkoa) dituen instalazioetan, bisitan etorri baitira. Han egon direnean, instalazioak eta beren autobusak egingo diren ekoizpen planta ikusteaz gain, laster beren flotara sartuko diren autobusen zehaztapen teknikoak berrikusi ahal izan dituzte, Irizar e-mobilityko ordezkariekin batera. 

Bisitaldian, Palmako alkateak hau esan zuen: “hiri iraunkorrago baten alde lan egiten dugu, eta, hori lortzeko, garraio publikoa funtsezkoa da. EMTk energia garbiak erabiltzen dituzten autobusak eduki behar ditu, eta hori egiten ari gara”.

Txema Oterok, Irizar e-mobilityko España & Portugaleko zuzendari komertzialak, berriz, hau adierazi du: “eskari hau estrategikoa da guretzat, Palmak merkatu turistiko gisa duen ikusgarritasunagatik. Oso harro gaude Palmako herritarren bizi kalitatea hobetzen lagundu ahal izateagatik. Ibilgailu hauek Irizar baterien teknologia izango dute, eta isilak izango dira eta ez dute igorpen kutsatzailerik sortuko. Irizar ie tram ibilgailuaren ezaugarri bereizgarria da diseinu minimalista eta apaingarririk gabekoa duen autobusa dela, eta bere ezaugarri guztiek alderdi funtzional zehatzei erantzuten dietela, erabiltzaileek berehala identifikatu ahal izango dituzten identitatea eta irudia sortu ahal izateko.

Ibilgailuek (Irizar ie tram modeloa) 12 metroko luzera izango dute, eta hiru ate, 22 eserleku (horietako lau MUPentzat dira), aulki gurpildunetarako gune bat edukiko dituzte. Gehienez, 70 bidaiari hartu ahal izango dituzte. 430 kWh-ko Irizar bateriak izango dituzte, eta pantografo alderantzikatu baten bidez edo Combo 2 karga hargunearen bidez kargatu ahal izango dira. Unitate eragilea 206 kW-ko motor zentral bat izango da.

Irisgarritasunak, segurtasunak, zirkulazio fluxuak eta bidaiariaren erosotasunak inspiratu dute Irizar ie tramen barrualdeko arkitektura. Alboetako leiho handiek eta barruko LED argiztapenak eta "open Air" gisako erdiko gangak emango dioten argitasunari esker, bidaiariek leku zabal, atsegin eta seguruan bidaiatzen ari direla sentituko dute.

Proiektuak Europar Batasuneko NextGenerationEU funtsen finantzaketa jaso du, Suspertze, Eraldaketa eta Erresilientzia Planean, Garraio, Mugikortasun eta Hiri Agendaren Ministerioaren bidez.

Eskaera hori Palmako EMT enpresaren flotaren berritzeko bigarren fasearen barruan sartzen da. Urtarrilaren amaieran hasi zen, eta guztira 59 autobus berritu behar dira energia garbiak dituzten ibilgailuekin. Horri esker, 8.000 tona dioxido gutxiago isuriko dira.

Eskaera berri honekin, Irizar e-mobilityk hiriei giltza eskuarerako elektromugikortasuneko soluzioak eskaintzen liderra dela berretsi du. Gainera, energia alternatiboetan eta proiektu handietan inbertitzen jarraitzen du, etorkizunean mugikortasuna iraunkorra, segurua eta konektatua izan dadin laguntzeko.

Iruñerrian Irizar e-mobilityko zero emisioko 20 autobus berri ibiliko dira

2022ko irailak 23

Irizar e-mobilityk kontratu bat itxi du Moventis taldeko Transports Ciutat Comtalekin (TCC) zero emisioko hogei autobus % 100 elektrikoz hornitzeko. Talde hori arduratzen da Iruñerriko Hiri Garraioko flota kudeatzeaz. Abangoardiako eta etorkizuneko diseinuak paper garrantzitsua izango du autobus horietan. Lehen unitateak 2023. urtearen erdialdean entregatzea aurreikusten da.

Irizar ie tram modeloko autobusak dira, 12 metroko luzerakoak. Tranbiaren ezaugarri estetikoak dituen autobusa, irisgarria eta ingurumena errespetatzen duena, bidaiarien esperientzia aberastera deitua dagoena.

Iñigo Azconak, Irizar e-mobilityko Espainiako eta Portugalgo komertzial arduradunak, honako hau gehitu du: "Oso pozik gaude Iruñerriko Mankomunitatea garraio publiko jasangarriaren arloan egiten ari den proiektu anbiziotsuetan laguntzeko aukera izateaz. Guretzat estrategikoa da Iruñerria bezalako eskualde batek gertuko eta eduki teknologiko handiko produktu baten alde egitea. Aukeratu duten ibilgailuaren modeloa, Irizar ie tram, gure intsignia da. Ie tram-aren ezaugarria da hirietako elektromugikortasuna iraultzen ari den produktu erakargarri bat dela. Bere pertsonalizazio maila handia, gaitasun handia, irisgarritasun nabarmena eta erosotasuna dira bere bertute handienetako batzuk. Espero dugu Iruñerriko herritarrek laster gozatzea ibilgailu honek eskaintzen dituen abantaila guztiez”.

Azken belaunaldiko Irizar bateriak dituzte, 430 kWh-koak, eta 206 kW-ko trakzio-motorrak. Ibilgailu horiek 3 ate dituzte, bidaiarientzako 25 besaulki (horietako 4 MUPentzat), gurpildun aulkientzako eta orgatxoentzako 2 gune, elbarrientzako arrapala, eta 80 bidaiari har ditzakete guztira. Autobusak pantografo alderantzikatuaren bidez kargatu ahal izango dira, edo kotxetegietan karga motelean.

Teknologiaren adibide gisa, atzerako ispiluen ordez, ibilgailu honek bi kamera digital ditu, gidatzeko postuan dauden pantailetan irudiak proiektatzen dituztenak, eta horrek argiztapen baldintza guztietan ikuspen bikaina bermatzen du. Gainera, bereziki azpimarratzen da ingurunearen segurtasun pasiboa, ADAS sistemek (gidatzeko laguntza sistema aurreratuak) gidatzean sor daitezkeen arrisku egoerak minimizatzen laguntzen baitute.

Iruñeko TCCk 159 autobuseko flota du eta haietako 135ek puntako orduetan ematen dute zerbitzua. Sareak 553 geraleku ditu (horien artean 328 markesina) eguneko 24 hiri-lineatan eta gaueko 10 lineatan.

Iruñerrian gertatzen ari den hirigintza hazkunde handiaren ondorioz, azken urteotan igo egin da Eskualdeko Hiri Garraioko bidaia kopurua.

Irunek Irizar e-mobilityren autobus elektrikoen aldeko apustua egin du

Aduna, 2022ko irailaren 19a

Irungo Udalak Irizar e-mobilityri esleitu dio zero igorpeneko lau autobus eta horien karga azpiegitura egiteko eta hornitzeko kontratua. Hiru autobus karga azkarrekoak izango dira, eta bat gauez kargatzekoa.

Autobus horiek Irunbuseko 2. linean (Bentak-Erdigunea) erabiliko dira, eta urtean 400.000 bidaiari baino gehiago garraiatzeko aukera emango dute. Garraiobide berritzaile eta iraunkorra da, eta, zalantzarik gabe, bidaiarien esperientzia hobetuko du.

  1. urte erdialdean entregatzea aurreikusten da.

Txema Otero Irizar e-mobilityko Espainia eta Portugalgo Zuzendari Komertzialaren hitzetan: “Oso harro gaude Irungo hiriari gure elektromugikortasun irtenbideak eskura eman ahal izateagatik, eta, era horretan, Irunek deskarbonizazioraekin eta mugikortasun iraunkorrarekin lotuta dituen helburuetan laguntzeagatik. Gure ekoizpen lantegia Irundik 30 km eskasera dago, eta hemen garatzen eta fabrikatzen ditugu gure ibilgailuak, bateriak eta kargarako azpiegiturak. Hauek dira autobusen ezaugarri bereziak: diseinua, irisgarritasuna eta pertsonalizazio maila handia.  Gainera, erabat isilak dira eta errespetuz jokatzen dute ingurumenarekin; horrenbestez, baliagarriak izango dira irundarren bizi kalitatea hobetzeko”.

Bestalde, Borja Olazabal Irungo Udaleko Mugikortasuneko ordezkariak adierazi duenez, "Hirian mugikortasun iraunkorrago baten alde emango dugun beste pauso bat da. 2019az geroztik, L-1 linea elektrikoa dugu, eta laster L-2 linea ere halakoxea izango da. Era horretan, gure garraio publikoen %90 metodo garbiagoekin mugituko dira, eta, hartara, aurre egingo zaie klima aldaketak gure inguruan eragiten dituen ondorioei".

Ibilgailuak Irizar ie tram modelokoak dira eta 12 metroko luzera dute. 22 eserleku, gidariarentzako besaulki bat eta gurpil aulki edo orgatxoentzako 2 gune dituzte, eta 75 bidaiarentzako tokia. Bidaiarien irisgarritasuna eta erosotasuna errazteko, ibilgailuek 3 ate, 2 arrapala, gurpil aulkientzako eta orgatxoentzako guneak eta braillez idatzitako gelditzeko sakagailuak dituzte.

Autobus horiek Irizar teknologiako azken belaunaldiko bateriak dituzte (430 kWh gaueko kargako ibilgailuek eta 90 kWh karga azkarreko ibilgailuek), eta 206 kW-ko trakzio motorrak. Era berean, Irizar e-mobilityk karga azkarreko estazio bat hornituko du, 2. linearen buruan (suhiltzaileen gunean) jarriko dena, eta gaueko karga sistema bat ere ezarriko du. Kargagailuak Jema Energy markakoak dira, Irizar Taldeko enpresakoak.

Autobusek kamera bidezko atzerako ispilu digitalak dituzte, hiriko autobusentzako irtenbide berritzaile eta eraginkorra; alegia, atzerako ispiluen ordez, bereizmen handiko kamerak eta barruko pantailak dituena, ikuspen optimizatua eta ergonomia hobetua izateko.

Lehen Irizar ie tram-a Zaragozara iritsi da!

Guztira 68 autobus Irizar izango dira Avanzako garraio publikoko flotara batuko direnak. 51 unitate 12 metrokoak izango dira eta gainerakoak 18 metrokoak.

Gaur aurkeztu da prentsaurrekoan lehen autobus hau eta horrekin batera, Zaragozako hiri-busaren sarea modernizatzeko eta elektrifikatzeko prozesua ere abian jarri da.

ABANGOARDIAKO AUTOBUS BAT

Irizar ie tram autobusa % 100 elektrikoa da, zero igorpenekoa. Tranbien ezaugarri estetikoak ditu: tranbien edukiera handia, sarbide erraza eta barne-mugikortasuna hiri-autobusen malgutasunarekin uztartzen ditu. Orain Zaragozara iristen den modeloak 12 metroko luzera du eta 430 kWh-ko bateria-edukiera ontziratua du, 220 km inguruko autonomia ematen diona.

Bere diseinuan 240kW-ko potentzia duen motor elektriko bat erabili da, eta 150kW-ko potentzia duen karga-sistema bikoitz bat sartu da – Bai pantografo alderantzikatu baten bitartez, bai mahuka bidez –. Arrapala bikoitza du (elektrikoa eta eskuzkoa) eta 78 bidaiarientzako lekua du (26 eserita eta 52 zutik), baita bi gurpil-aulkientzako ere.

Irizar ie tram autobusaren diseinuan, lengoaia estetiko minimalista bat, apaingarririk gabekoa, oinarri hartuta, ezaugarri guztiek alderdi funtzional zehatzei erantzuten diete. Horrek erabiltzaileek berehala identifikatzen dituzten identitatea eta irudia ematen dizkio. Irisgarritasuna, segurtasuna, barne-mugikortasuna eta bidaiarien erosotasuna dira barne-arkitekturaren inspirazio-iturri. Ondorioz, bidaiari-leku argia, erosoa, zabala, atsegina eta segurua lortu da.

Bidaiarien irisgarritasun eta barne-mugikortasun handiak ditu autobusak: guztira izan ditzakeen lau ate labaingarriak, behe-zoru integrala, jarlekuen kokapena, barne-antolamendua (ibiltzeko pasillo zabalak), gurpil-aulkientzat eta/edo haur-kotxeentzat gordetako lekuen seinaleak, geldialdia eskatzeko soinu-informazioa, txartela baliozkotzeko gailuak, gidariaren lekuaren diseinua, eta sarbide erosoa eta ahaleginik gabekoa.

Barne-esparruaren diseinuaren helburua bidaiariei zabaltasun- eta argitasun-sentsazioa sorraraztea izan da. Ibilgailuaren barruko behe-zoru integralari eta jarlekuen kokapenari esker, bidaiariak oso arin igo eta jaitsI daitezke geldialdietan, eta eroso mugi daitezke ibilgailuaren barruan.

Irizar autobus elektrikoek 750.000 km baino gehiago eta 60.000 karga ultra azkar egin dituzte Suitzako Schaffhausen hirian

Aduna, 2022ko uztailaren 8a

Hala, Irizar Taldeak hiri horretako elektromugikortasun proiektu handinahia sendotu du, zeinaren bidez, hiriko baldintza zehatz batzuen arabera autobusak eta karga estazioak hornitu, eta soluzioak eskura emateko gaitasuna erakusten duen.

Bahnhofstrassen kargatzeko azpiegitura abian jarri zenetik, duela urtebete, zero igorpeneko Irizar ie tram autobusak  egunero ibiltzen dira Shaffhauseneko kaleetan, non 750.000 km baino gehiago egin dituzten.  Kargaren portaerari dagokionez, autobus hauek aurreikusitako helburuak bete dituzte eta 60.000 karga ultra-azkar baino gehiago egin dituzte.

Iñigo Etxeberria Irizar e-mobilityko Esportazio Zuzendari Komertzialak proiektuaren amaiera ekitaldian esan zuen bezala, “Eskerrak eman nahi dizkiogu VBSHri eta Schaffhausen hiriari, gugan jarri duten konfiantzagatik. Oso harro gaude hiri honetan gure elektromugikortasun soluzioak eskura eman ahal izateaz. Zalantzarik gabe, proiektu honen arrakastaren gakoa VBSHrekin eta gainerako laguntzaileekin lankidetza estuan aritzea izan da”.

Proiektu aitzindaria eta herrialdearentzat garrantzi handikoa da, izan ere, bere balio kate osoan zero igorpeneko aukerako karga duen autobus elektrikoen lehen proiektua da eta, zalantzarik gabe, Suitzako gainerako hirietarako erakusleiho izango da.

Azpimarratzekoa da, halaber, proiektu bakarra dela, nola Suitzan, hala Europan. Hiri horretako Bahnhofstrasse kalean, 600 kW-eko karga azkarreko hamabi puntu jarri dira. Gainera, karga estazioetarako energia SH Power zentral hidroelektrikoan sortzen da, Rhin ibaiko uren indarrak bultzatuta, Schaffhausen parean, eta, hala, iraunkortasunari laguntzen zaio.

VBSHk eta Irizar e-mobilityk erakusten dute garraio publikoa iraunkorra, eraginkorra, adimenduna, irisgarria, segurua eta konektatua izan daitekeela eta, aldi berean, Europako herritarren itxaropenak bete ditzakeela.

Proiektuaren datuak

Autobus elektrikoen proiektuak zero igorpeneko Irizar ie tram ereduko hamabost autobus elektriko (hamabi metroko zortzi eta hemezortzi metroko zazpi), 600 kW-eko hamahiru kargagailu ultra-azkar eta kotxetegietako hamasei karga estazio barne hartzen ditu. Jemak, Irizar Taldeko enpresak, garatu eta fabrikatu ditu kargagailuak.

Irizar e-mobilityko zero emisioko 30 autobus Valladoliderako

Aduna, 2022ko ekainaren 27a  

AUVASA  (Autobuses Urbanos de Valladolid) garraio publikoko operadoreak Irizar e-mobility enpresarekin akordio marko bat sinatu du, Irizar ie tram modeloko zero emisioko 30 autobus eta karga-azpiegiturak barne hartzen dituena. Unitate horiek bi urtetan banatuko dira, eta 2022aren amaieran lehenengo 11 unitateak entregatuko dira. Gaur egun ibilgailu mota hori dabilen lineetan txertatuko diren 18 metro luzeko zero emisioko lehen autobus artikulatuak dira.

Irizar e-mobilityk honako hauen bisita jaso du astelehen honetan: Oscar Puente, Valladolideko Udaleko alkatea; Luis Ángel Vélez, Valladolideko Udaleko Mugikortasun eta Hiri Espazioko zinegotzia; eta Álvaro Fernández, AUVASAko gerentea. Bisitan, Valladolideko Udaleko, AUVASAko eta Irizar e-mobilityko kideek ibilgailuen azken xehetasunak eta zehaztapenak berrikusi ahal izan dituzte, lehenengo unitateak ekoizten hasi aurretik, baita instalazioak eta ekoizpen-lerroa bisitatu ere.

"Oso harro gaude AUVASAk eta Valladolidek beren flotaren eraldaketa elektrikoa hasteko guregan jarri duten konfiantzaz. Irizar ie tram da aukera, bere diseinu moderno eta berritzaileagatik hiria bereizten duen erakargarritasuna eskaintzen duen autobusa, eta, aldi berean, gidariarentzako eta bidaiarientzako erosotasuna, irisgarritasuna eta segurtasuna maximizatzen dituena. CO2 eta zarata emisio baxuek eta bidaiariari eskaintzen dion esperientzia handiak Irizar ie tram autobus berezi  bihurtzen dute, hiriko erdiguneetan erabiltzeko egokia” gaineratu du Txema Oterok, Irizar e-mobilityko Espainiako eta Portugaleko Zuzendari Komertzialak.

Irizar e-mobilityk hornituko dituen ibilgailuak azken belaunaldiko bateriez elikatuko dira, 630 kWh-ko gaitasuna izango dute eta karga sistema bikoitza, pantografo alderantzikatua izango dute eta kotxetegietan entxufe adimendunaren bidez kargatuko dira, Jema Energyk, Irizar Taldeko enpresak, egindakoak.

Pantografo alderantzikatu bidezko karga sistemari esker, autobusa kotxetegietara iristen denean, autobusaren eta kargagailuaren arteko komunikazioa ezartzen da, eta pantografoa automatikoki jaisten da. Sistema hori bateragarria da merkatuko ia autobus elektriko guztiekin, eta ibilgailua egunero kargatzeko prozesua errazten du.  

Autobus honen barrualdea erosoa eta berritzailea denez, irekitasun eta argitasun sentsazioa ematen du, bai bidaiariei eta baita gidariari ere.  Ibilgailuek 43 eserleku, aulki gurpildunentzako 3 gune , MUPentzako 4 eserleku eta 105 bidaiari garraiatzeko gaitasuna dute. Gainera, barruan CO2 neurgailuak ditu, bai eta multimedia eta informazio sistema ere, 29´´ko pantailekin eta USB karga atariekin.

Barruan nahiz kanpoan sarbidea eta joan-etorri arina errazteko, 4 ate ditu. Eta segurtasuna hobetzeko eta bidaiarientzat bidaia erosoa bermatzeko, autobusek atzerako ispiluak ordezkatzen dituzten kamerak izango dituzte, aurreko, alboko eta atzeko ikuspena handitzen dutenak, gidatzen laguntzeko sistema aurreratuak (ADAS) eta oinezkoen eta txirrindularien babesa, bidaia lekua kontrolatzen duten telebista zirkuitu itxiez gain (CCTV).

Horrela, Valladolidek apustu handia egin du garraio publikoa aukera berritzaileago eta hiritarrekiko eta ingurumenarekiko begirunetsuago bihurtzeko. Zero emisioko Irizar ie tramek  ingurumen onurak dakartza; besteak beste, CO2 igorpenik ez eta zarata maila txikia. Gainera, autonomia eta ustiapen kostu ezin hobea bermatzen du.

Image